“STIVA DA FILAR”

CONCERT & CANT AVIERT EL MUSEUM

Ils dis vegnan pli e pli cuorts – las seras pli e pli liungas

Strusch enzatgi da nus sa pli seregurdar co ei vegneva passentau las seras liungas d’atun ed unviern dils temps ch’ei deva buc aunc la televisiun…
Igl onn 2012 havein nus decantau ell’ovra “Las stagiuns” da Josef Haydn la scena en stiva ina sera d’atun, leu nua ch’ei vegneva filau, raquintau e cantau da cuminonza. Suenter che la raccolta fuva sut tetg havev’ins dapli peda per famiglia e per lavurs en casa.

Gest aschia ina situaziun vulein nus crear cun nies concert e cant aviert il november 2023 el Museum Regiunal Surselva a Glion.
Nus schein resunar il cant e la musica els zulers, ellas stanzas e salas dil museum e giughein cun l’atmosfera unica dil contuorn e dils utensils dils temps vargai.

Il Chor Surselva envida tuttas e tuts da star da cumpignia in’uriala, da cantar ensemen en ina, duas ni pliras vuschs canzuns popularas e meins popularas.
Ina rola centrala giogan perquei las cumposiziuns da Tumasch Dolf e sia “Stiva da filar” – mo era autras canzuns che van tgunsch da cantar e vegnan accumpignadas al clavazin ed ulteriurs instruments. Quels duein lu era sustener il cantar e far musica da cuminonza.

Il cantar el chor – en cumpignia stat a nus a cor – perquei less jeu envidar in/a e scadin/a da passentar ina sera d’atun tut speciala cun separticipar al cant – ni cun tedlar!

Cordialmein

> Plan d’emprovas, annunzia e notas